صدر مملکت آصف علی زرداری اور سابق وزیراعظم محترمہ بے نظیر بھٹو کی صاحبزادی بختاور بھٹو زرداری نے اپنے نومولود بیٹے کا نام رکھ دیا ہے۔
دو بیٹوں کی پیدائش کے بعد بختاور بھٹو نے گزشتہ روز انسٹاگرام پر ایک پوسٹ شیئر کرتے ہوئے اپنی زندگی میں آنے والے تیسرے بیٹے کی خوشخبری سنائی تھی۔
اب ایک سوشل میڈیا پیغام میں انہوں نے اپنے تیسرے بیٹے کے نام سے آگاہ کیا ہے۔ بختاور بھٹو نے اپنے بیٹے کا نام ’میر ذوالفقار محمود چوہدری‘ رکھا ہے۔ اپنے پیغام میں انہوں نے بچے کی پیدائش کی تاریخ بھی لکھی جو 20 اکتوبر 2024 ہے۔
بختاور بھٹو زرداری نے اپنی انسٹاگرام پوسٹ میں لکھا: ’’اے اللہ، اسے شفقت اور محبت والا بچہ بنا۔ اسے ہمارے پیارے نبی محمد صلی اللہ علیہ وسلم کے راستے پر چلا اور اس کی حکمت اور بھلائی کی روشنی کو اس دنیا میں پھیلادے۔‘‘
بختاور بھٹو نے نام کے اعلان کے ساتھ ایک تصویر پوسٹ کی ہے جس میں ایک بچے کو شمشیر تھامے گھوڑے پر سوار دیکھا جاسکتا ہے، تصویر پر ’میر ذوالفقار‘ درج ہے۔
بختاور بھٹو نے اپنے نومولود کا نام اپنے نانا کے نام پر رکھا ہے۔
بختاور بھٹو زرداری 27 نومبر 2020 کو دبئی کے بزنس مین محمود چوہدری سے شادی کی بندھن میں بندھ گئی تھیں۔ 10 اکتوبر 2021 کو ان کے ہاں پہلے بیٹے میر حاکم محمود چوہدری کی پیدائش ہوئی اور 5 اکتوبر 2022 کو دوسرے بیٹے کی ولادت ہوئی جس کا نام میر سجاول محمود چوہدری رکھا گیا تھا۔