بالی وڈ کے مشہور اداکار رنویر سنگھ نے اپنے لگژری گاڑیوں کے کلیکشن میں ایک اور شاہکار شامل کر لیا ہے۔
بیٹی کی پیدائش کے چند ہفتوں بعد، رنویر نے 4.74 کروڑ روپے کی نئی رینج روور 4.4 LWB خریدی ہے۔ رنویر کے لگژری لائف اسٹائل اور مہنگی گاڑیوں کے شوق کو دیکھتے ہوئے، یہ گاڑی ان کی شخصیت کا ایک اور اظہار ہے۔
نئی گاڑی کے ساتھ رنویر کی مخصوص '6969' نمبر پلیٹ بھی نظر آئی، جو وہ اپنے لیے خوش قسمتی کی علامت سمجھتے ہیں۔ یہ نمبر پلیٹ رنویر کی چوتھی گاڑی پر لگائی گئی ہے۔
رنویر اور ان کی اہلیہ دپیکا پڈوکون نے 8 ستمبر کو اپنی پہلی بیٹی کی پیدائش کا اعلان کیا تھا۔ انسٹاگرام پر سادہ اور جذباتی پوسٹ کے ذریعے دونوں نے لکھا: "Welcome Baby Girl!"۔ اس خوشخبری پر مداحوں اور شوبز ستاروں نے انہیں دل کھول کر مبارکباد دی۔
رنویر اور دپیکا کے آنے والے پروجیکٹس
رنویر اور دپیکا والدین بننے کی خوشیوں میں مصروف ہیں، تاہم دونوں کے پاس آنے والے دنوں میں بڑے پروجیکٹس بھی ہیں۔ رنویر روہت شیٹی کی فلم 'سنگھم اگین' میں اپنے کردار سِمبا میں واپس آئیں گے، جبکہ دپیکا اس فلم میں پہلی بار خاتون پولیس افسر شکتی شیٹی کے کردار میں نظر آئیں گی۔ فلم کی ریلیز یکم نومبر کو متوقع ہے۔
دپیکا نے حال ہی میں اعلان کیا ہے کہ وہ مارچ 2025 تک اپنی بیٹی کے ساتھ وقت گزارنے کے لیے میٹرنٹی بریک لیں گی۔ دوسری طرف، رنویر آدتیہ دھر کی ایک فلم کی شوٹنگ میں مصروف ہیں، لیکن انہوں نے کچھ دن اپنی فیملی کے قریب رہنے کا فیصلہ کیا ہے۔